மழை பெய்கிறது
ஊர் முழுதும் ஈரமாகி விட்டது.
தமிழ்மக்கள், எருமைகளைப்போல, எப்போதும் ஈரத்திலேயே
நிற்கிறார்கள்,
ஈரத்திலேயே உட்காருகிறார்கள்,
ஈரத்திலேயே நடக்கிறார்கள்,
ஈரத்திலேயே படுக்கிறார்கள்
ஈரத்திலேயே சமையல்,
ஈரத்திலேயே உணவு
உலர்ந்த தமிழன் மருந்துக்குக்கூட அகப்படமாட்டான்.
ஓயாமல் பெருமழை பொழிகிறது,
தமிழ் மக்களிலே பலருக்கு ஜ்வரம் உண்டாகிறது.
நாள்தோறும் சிலர் இறந்துபோகிறார்கள். மிஞ்சி யிருக்கும் மூடர்
விதிவசம் என்கிறார்கள்
ஆமடா, விதி வசந்தான்.
‘அறிவில்லாதவர்களுக்கு இன்பமில்லை’ என்பது ஈசனுடைய விதி.
முன்னெச்சரிக்கையில்லாத தேசத்திலே பேரிடர் விளைவது விதி.
தமிழ்நாட்டிலே முன்னெச்சரிக்கையில்லை, உண்மையான தற்காப்புகளை
வளர்க்காமல்
இருப்பனவற்றையும் மறந்துவிட்டுத் தமிழ் நாட்டுப் பார்ப்பார் பொய்க்கதைகளை
மூடரிடங் காட்டி வயிறு பிழைத்து வருகிறார்கள்.
குளிர்ந்த மழையையா விஷமென்று நினைக்கிறாய்?
அது அமிழ்தம், நீ ஈரமில்லாத வீடுகளில் நல்ல உடைகளுடன் குடியிருப்பாயானால்,
மழை நன்று, அதனை வழிபடுகின்றோம்.
